Jamna-kulturo

La Jamna-kulturo aŭ Jamnaja-kulturo (la nomo venas el adjektiva formo de la rusa vorto яма, „fosaĵo”) estis malfrua kuproepoka – frua bronzepoka kulturo en la ĉirkaŭo de la riveroj Bug, Dnestro kaj Uralo. La kulturo ekzistis de la 36-a ĝis la 23-a jarcentoj a.K., kiel unuperiodo de la kurgan-kulturo. Ĝin formis karakterize ĉasistoj-bredistoj; nur en la ĉirkaŭo de riveroj okazis kultivado de agro. Postrestis spuroj de kelkaj konstruaĵoj el grundo. La Jamnaja-kulturo estis posteulo de la Hvalinski-kulturo ĉe la meza parto de Volgo kaj la Srednij-Stog-kulturo ĉe la meza parto de Dnepro. El la Jamna-kulturo evoluis en okcidento la katakomba kulturo, en oriento la Srubna-kulturo.